लग्नसोहळा हा प्रत्येकाच्याच आयुष्यातला अविस्मरणीय दिवस असतो. प्रत्येकालाच तो खास आणि लक्षात राहण्यासारखा बनवायचा असतो. सध्याच्या लग्नसमारंभात पाहिलंत तर ‘रॉयल’पणा आला आहे. अगदी डेकोरेशन पासून कपड्यांपर्यंत सगळंच राजेशाही थाटात असतं. ह्यात फक्त नवरा-नवरी नाही तर संपूर्ण कुटुंबाचाच राजेशाही थाट असतो. व्हिवाच्याच एका लेखनातून आपण एकदा तरुणांचा पेशवाई लग्न थाट पहिला. कोविडच्या काळात लग्नसराई थांबल्या होत्या पण त्याही वेळी लोकांनी आपल्या कपडे दागिन्यांवर खर्च करून भरपूर हौस केली. ह्यात आता अतिशय महत्वाची भूमिका साकारतात ते म्हणजे डिझायनर्स आणि मेकअप आर्टिस्ट. हल्ली लग्नाचा राजेशाही थाट हा फक्त श्रीमंत किंवा सेलेब्रिटींचा खेळ राहिलेला नाही. सगळ्यांनाच लग्न थाटामाटात आणि साग्रसंगीत पद्धतीने करायचं असतं.
ह्याच निमित्ताने काही स्टायलिस्ट आणि डिझायनर्सशी बोलणे झाले. आज तरूणाई लग्नाच्या कपड्यांबाबतीत अतिशय चूझी आणि पर्टिक्यूलर झाली आहे. त्यांचे विचार अतिशय थेट आहेत. प्रत्येकालाच वेगळं काहीतरी हवंय आणि आज फॅशन क्षेत्र इतकं प्रगल्भ आहे की प्रत्येकजण आपआपली वेगळी स्टाईल करू शकतोय. पेस्टल रंग ट्रेंण्ड मध्ये आहेत ह्यात वादच नाही परंतू गडद रंग लोप पावतायेत असेही नाही. त्या रंगांमध्येही वेगवेगळे कॅाम्बिनेशन्स् करून सुंदर पेहराव करता येतो. आता वेलवेट फॅब्रिक मध्ये फार फिकट रंग नसतात पण आता डार्क वेलवेट नऊवारींची फॅशन आली आहे. लाल, हिरव्या वेलवेट नऊवारी साड्या व त्यावर कॅान्ट्रास्ट असा शेला बखूभीच राजेशाही दिसतो. असे अनेक नामांकित डिझायनर्सचे म्हणणे आहे.
मोठ्या आणि ब्रँडेड स्टायलिस्ट सोबत स्टार्टअप स्टायलिस्टशी सुद्धा बोलून त्यांच्या कल्पना जाणून घेण्याचा प्रयत्न केला. तेजश्री गायकवाड हिने नुकताच आपला ‘स्टाईल से’ नावाचा ब्रँड सुरु केला आहे. ती सांगते, “लग्नाच्या प्रत्येक फंक्शनसाठी कपडे बनवून घ्यायचे आहेत. पण प्रामुख्याने हा मुद्दा जाणवतो कि मुलींना हे सगळे कपडे नंतर घालायचे पण आहेत. त्यामुळे ते हेवी किंवा भरजरी असले तरी ट्रेंडी पाहिजेत. तसंच आता रंगसंगती मध्येही बदल होताना दिसतायेत. हळदीला पिवळाचं किंवा मेहेंदीला हिरवाचं असं काही राहिलेलं नाही. थोडा बॉलिवूडचा परिणाम म्हटलं तरी चालेल. अगदी रॉयल नाही परंतु इंस्टाग्रामेबल कपडे आणि विशिष्ट थीमचे कपडे लग्नात आजकाल सगळे घालताना दिसत आहेत. कस्टमायझेशनला आज जास्त महत्व आहे हे नक्की.”
वेडींग कलर्स मध्ये पेस्टल्स चा बोलबाला आहे हे आता त्रिवार सत्य आहे. अगदी रेशमी पैठण्या सुद्धा आजकाल कॉटन मध्ये बनवून पेस्टल कलर्समध्ये वापरल्या जात आहेत. नुकतेच नवविवाहित सिद्धार्थ- कियाराचा लुक पाहिलात तर तिनेही लग्नाचा दिवशीसाठी फुशीय पिंक अशा पेस्टल रंगाचा लेहेंगा परिधान केला आहे. लग्न सोहळा आजकाल किमान ३-४ दिवसांचा असतो. मेहेंदी, संगीत, हळद या सगळ्यांसाठीच वधू वर आणि त्यांच्या घरचांची थीम असते.
सध्या वधूवरांना कोणकोणते रंग आवडतायेत हे पण फार महत्वाचे आहे. या सगळ्या डिझायनर्सशी बोलून काही ट्रेंड सेंटर रंग लग्नसराईसाठी सध्या प्रसिद्ध आहेत हे समजले. ते का आहेत हे सुद्धा डिझायनर्सने सांगितले. या सगळ्या रंगांचे वैशिष्ट्य म्हणजे कुठल्याही पद्धतीच्या पोशाखात हे रंग सुंदर दिसतात. पारंपारिक पैठणी, जरीची साडी ते अगदी लेहेंगा किव्हा वेस्टर्न गाऊन मध्ये हे रंग पाहायला मिळतात
- ऍप्रिकॉट (जर्दाळू) कलर
पिवळट केशरी असा हा रंग असतो. हा सध्या ट्रेंड सेंटर रंग आहे. वधू-वरांना कलर कॉर्डीनेट करण्यासाठी हा रंग अतिशय उठावदार दिसतो. तसाच तुमचे स्वतःचे लग्न नसेल तरी या रंगाचे पोशाख तुम्ही परिधान करू शकता. कुठल्याही कलर कॉम्प्लेक्सच्या व्यक्तीला हा रंग चांगला दिसतो. डिझायनर्स सांगतात हा रंग लाल, राणी, किंवा तत्सम डार्क रंगाच्या समन्वयात अतिशय उठून दिसतो. - स्यान (निळसर) रंग
हा फ्रेश आणि आधुनिक रंग आहे. उन्हाळ्यातल्या लग्नांमध्ये हा रंग परफेक्ट फिट होऊ शकतो. मेकअप आर्टिस्ट आणि डिझायनर्सना या रंगात जास्तीत जास्त कल्पकता आणता येते. हा रंग जरा फेंट शेडकडे जाणारा असल्याने सिल्वर किंवा तत्सम चकचकीत रंगाशी समन्वय होऊ शकतो. - ऑलिव्ह ग्रीन कलर
हा फारच लोकप्रिय रंग आहे. ऑफबीट आणि हटके स्टायलिंग साठी हा रंग अतिशय आकर्षक आहे. मेहेंदी, संगीत किंवा रेसेपशनसाठी हा रंग भरजरी ज्वेलरी आणि मेकअप सोबत स्टाईल केल्यावर वधूसह इतरांनाही खुलून दिसू शकतो. कॉपर, डार्क हिरवा, गुलाबी असे रंग तुम्ही ऑलिव्ह ग्रीन सोबत परिधान करू शकता. डिझायनर्सच्या भाषेत हा रंग अंडर-टोन्ड आहे त्यामुळे स्टायलिस्ट ने हा रंग स्टाईल करताना अति दक्षता घेणे गरजेचे आहे. - फुशिया पिंक कलर
हा अतिशय गोड आणि मोहक रंग आहे. कुठल्याही वयोगटातल्या स्त्रीला हा रंग उठून दिसतो. डिझायनर साडी, लेहेंगा, इंडो-वेस्टर्न पॅन्ट सूट, अशा अनेक प्रकारे या रंगाचे कपडे तुम्ही परिधान करू शकता. हा रंग शक्यतो सिल्वर रंगाशी जास्त समन्वय साधतो किंवा अशाच लाइट पेस्टल रंगांसोबत छान दिसतो. - स्मोकी कलर
हा रंग चॅाकलेटी, मरून, अशा रंगाच्या जवळ आहे. ह्या रंगात फार वेगळं काही नाही कारण भारतीय लग्न परंपरेत जुन्या काळात शालू अशाच रंगांचे असायचे. तुम्हाला रॉयल लुक द्यायचा असेल तर हा रंग सुयोग्य आहे. या रंगावर फोटोशूट अतिशय राजेशाही दिसते. परंतु हा रंग डार्क असल्याने तुमचा स्किनटोन, मेकअप, दागिने या सगळ्याकडे खूप बारकाईने लक्ष द्यावे लागते. लाईट सोनेरी, मोती असेच रंग ह्याला कॉन्ट्रास्ट होतात.
लग्नसमारंभ म्हटलं की काही रंग डोक्यात पक्के असतात पण आज तशी परिस्थिती नाही. प्रेझेंटेबल दिसण्यासाठी गडद किंवा डार्क रंगांची गरज नाही. पेस्टल, स्मोकी, मिक्स अन मॅच रंगसंगती आजकाल बघायला मिळतेय. रॉयल वेडींगचा ट्रेंड आज कपडे, दागिने, मेकअप, लोकेशन, अशा सगळ्याचं माध्यमातून बघायला मिळतोयं. हा रॉयल लुक आणण्यासाठी कपड्याच्या कापडापासून ते आय मेकअप पर्यंत डिझायनर्स आणि स्टायलिस्ट सतत मग्न असतात. बॉलिवूडचा एकूणच प्रभाव आजच्या लग्नाळू तरुणाई वर झालेला दिसतोय.
कियारा अडवाणी चा रॉयल संगीत लुक तरुणाईने फारच उचलून धरला. तिचा स्वरोस्की पर्ल्सचा लेहेंगा अगदी डोळ्याचे पारणे फिटवणारा होता. अथिया शेट्टी व के एल राहुलनेही रॉयल परंतु डिसेन्ट लुक केला होता. त्याचेही सगळीकडून कौतुक झाले.
नवरदेवाच्या फॅशनलाही काही परिसीमा नाही. मान्यवर आणि इतर तत्सम ब्रॅण्डशी बोलल्यावर असे लक्षात आले की कशीदा वर्क केलेली भरजरी शेरवानी आणि दुपट्टा, ब्रोकेड पॅटर्नचं जॅकेट, हाफ लाईट आणि हाफ गडद फ्युजन पद्धतीचे कपडे, शॅार्ट कुर्ता, गडद रंगांचे चिकनकारी कुर्ते असे काही ट्रेंड्स मुलांमध्ये लोकप्रिय आहेत. पैठणी फॅशन तर आता डेली ट्रेंड झाला आहे. आधी फक्त समारंभात केली जाणारी फॅशन आता प्रत्येक छोट्या मोठ्या कार्यक्रमात होताना दिसते आहे. मोठमोठे ब्रॅण्ड्स वेडींग कलेक्शन घेऊन येत आहेत. मोहे, कोहिनूर, रघुकुल, कांथा, पेशवाई अशा लोभस नावांच्या वेडींग कलेक्शनची मांदियाळी सध्या पाहायला मिळतेय.
एरवी तरुणांबद्दल मानला जाणारा समज, की त्यांना लवकर लग्न करायला आवडत नाही, सगळं शॉर्टकट लागत, वगैरे वगैरे हे सगळंच बाजूला ठेऊन आजची तरुणाई लग्नासाठी हौशी आहे हेच यातून सिद्ध होते.
English