लग्नसोहळा हा प्रत्येकाच्याच आयुष्यातला अविस्मरणिय क्षण असतो किंबहुना प्रत्येकाला तो तेवढा खास बनवायचा असतो. हल्लीच्या लग्न समारंभात पेशवाई थिम पुन्हा एकदा लोकप्रिय होताना दिसतेय. अंगरखा, पगडी, शिरपेच, मोती पोळ्याच्या माळा, नववारी, दागिन्यांचा साज आणि बरंच काही… या सगळ्या थाटमाटात तरूणांची लगीनघाई सध्या दिसून येत आहे. यात दागिन्यांचा आणि कपड्यांचा लूक लग्नात अगदी शोभून आणि साजेसा दिसतो, असे तरूणांचे मत आहे. यंदाच्या मौसमात अगदी जसाच्या तसा, ऑथेंटिक मराठमोळ्या पोषाखांना पसंती मिळत आहे, त्याचाच तज्ञांशी बोलून वेध घेणारा हा लेख.
यंदा सणसमारंभाना, लग्नाला किंवा कुठल्याही तत्सम ओकेजनला अस्सल मराठी पहेराव जसाच्या तसा अगदी संशोधन करून मिरवला जात आहे. आपल्या लग्नात ही थिम ज्याने केली होती तो नवविवाहीत तरूण मयूर देशपांडे सांगतो, “माझ्या बायकोला अदितीला आणि तिच्या घरच्यांना नववारी पेहराव करायचा होता म्हणून त्याला साजेसा पेहराव आपलाही असावा असं मनात आलं. अंगरखा, पायजमा, उपरणे, कंबरपट्टा, पगडी असा पेशवाई लूक उठून दिसेल आणि नव्वरीची शोभा वाढवेल असं ठरलं. आता हे पेशवाई ड्रेस आपल्या लग्नसमारंभात वापरले जाईल पण नंतर काय? त्या रेशमी कापडाची किंमतही जास्त असते, मग एवढा खर्च एका वापरासाठी न करता ते सगळं भाड्याने घ्यायचे असे ठरवले. भाड्याने घेणे म्हणजे कोणीतरी वापरलेले कपडे असणार असे वाटले होते, पण तसंच अगदी नाही, मास्टर रघुनाथ (पूणे रमणबाग) यांनी आमच्या मापाप्रमाणे नवीन कपडे शिवून दिले. आम्ही पेशवाई पेहराव घातले म्हणजे संस्कृती जपली जाईल असे अगदी आम्ही काही मिरवत नाही. या ड्रेस मधला कमफर्ट मला खूपच आवडला, पैठणी काठ असलेले उपरणे व पगडी अदितीच्या साडीला मॅचिंग करता आली. पॅण्ट किंवा आजकालच्या आधूनिक पेहरावापेक्षा पारंपरिक असणारा राजेशाही थाट मांडव शोभा देऊन गेला हे नक्कीच.” असं तो म्हणतो.
पेशवाई स्टायलिंगचा फंडा
आपल्या लग्नात स्वत:चा लूक डिझाईन करून घेणं हे सुद्धा तरूणांना आकर्षित करत आहे. या थिम बद्दल सॅलिब्रिटी स्टाईलिस्ट श्वेता शिंदे सांगतात, “होय, हे खरं आहे की आता मुलामुलींना लग्नसराईत अस्सल खराखुरा मराठमोळा लुक हवा आहे, अगदी लेंहेगा हवा असेल तर तोही पैठणीच्या कापडाचा असं. मुंबई, पुणे, नाशिक येथील मराठमोळ्या लग्नसराईत जून्या पोषाखांची कास दिसून येते आहे. मुलांनीही बाराबंदी, अंगरखा याची ओढ जाणू लागली आहे. आपण फॅशनमध्ये यु-टर्न घेतोय. आपल्या रूट्सकडे वळतोय असं म्हणायला हरकत नाही. अभिनेत्री मिताली मयेकरने ब्राईट पोपटी नववारी नेसली होती, तसे साजसे दागिनेही घातले होते. अभिनेत्री अभिज्ञा भावेने पेस्टेल पर्पल रंगाची कस्टमाईझ एमब्रोयडरीची नववारी नेसली होती. या दोघींनीही अस्सल मराठमोळा लुक केला होता. या उदाहरणांवरून स्वतःची टेस्ट बिल्ड करा असं मी म्हणेन. लग्नामध्ये प्रयोग करायला सुरुवात करायला काहीच हरकत नाही. आपण बऱ्याचदा लग्नात पिवळ्या रंगांच्या नववाऱ्या नेसतो पण तूम्ही पेस्टेल रंगाची नववारी नेसली तरीही चालेल. अभिज्ञा भावेने पेस्टेल पर्पल रंगाची नववारी नेसून खूप जणींना प्रेरित केलं आहे. एक डिझायनर म्हणून मी हाच विचार करते की तूमची आवड सांगा मी माझ्या कल्पनेने ते खुलवेन. आपल्या मराठमोळ्या पारंपरिक लुकवर जरूर मेहनत घ्या.” असं श्वेता यांनी सांगितले. सध्या पाहाल तर डिझायनर मास्क घालून लग्नात मिरवण्याचा ट्रेण्ड नक्की जोर धरेल असंही त्या म्हणाल्या.
मेकअप पेशवाई लुकसाठी….
स्टायलिंगप्रमाणे पेशवाई फॅशन करताय तर तशी केशरचना, दागिने आणि चपला तर आल्याच परंतु मेक-अप नाही असं होऊच शकत नाही. ‘एनरिच’ सेलॉनच्या क्रिएटिव्ह सेलिब्रिटी एक्स्पर्ट प्रिया सूरेका मेकअप आणि स्टायलिंगबद्दल सांगतात, “मराठमोळ्या वधूसाठी निळा, जांभळा, मजेंडा अशाप्रकारचे बरेच रंग किंवा त्याला कॉन्ट्रास्ट असलेले आय मेकअपसाठी अगदी उत्तम. तूमच्या कपड्यांच्या रंगांनूसार तूम्ही डोळ्यावरील आणि ओठांवरील रंगाची शेड ठरवू शकता. उदाहरणार्थ, जर तुम्ही पर्पल स्मोकी किंवा ब्ल्यू स्मोकी आय मेकअप करणार असाल तर ओठांवर न्यूड ग्लोसी लिपस्टिक लावा. जर तुम्ही ओठांवर मजेंडा, रेड किंवा पिंक असे गडद रंग वापरणार असाल तर डोळ्यांसाठी तूमच्या साडीच्या एमब्रोयडरीला मॅचिंग असा लुक ठेवा. उदाहरणार्थ, जरदोसी वर्क असेल तर गोल्डन किंवा सिल्व्हर रंग डोळ्यांसाठी ठेवा किंवा आरी वर्क असेल तर मणी आणि मोत्यांप्रमाणे तूम्ही आय मेकअप करावा परंतु हेही लक्षात ठेवा की तूमचे डोळे ग्लिटरप्रमाणे नक्की चिमकतील कारण तूमची ज्वेलरीही तितकीच ग्लोडन असते. गालांवरती शक्यतो लिपस्टिकच्या जवळपास जाणारा ब्लश वापरा. वधूचा मेकअप लुक सरतेशेवटी चंद्रकोर बिंदीने पुर्ण होऊच शकत नाही. चंद्रकोर त्यावर मोत्याच्या मुंडावळ्या म्हणजे अगदी हटके पारंपरिक लुक तूमचा पुर्ण झालाच म्हणून समजा.” प्रिया यांनी वधूप्रमाणे पेशवाई लुक करताना वराने देखील कुठला मेकअप लुक करावा हे सांगितले, “जर वरासाठी विचार केला तर तूम्ही सिंपल मेकअप करा. तूमचे केस हेअर जेलने सेट करा. दाढी-मिशीचा लुक व्यवस्थित ट्रिम करा. चेहऱ्यावर थोडं फाऊंडेशन लावा. भुवया, ओठ आणि आयलॅशेसला थोडा ब्लाम लावा.” असं प्रिया सांगतात.
जुन्या दागिन्यांचा मोह!
चिंचपेटी आणि ठूशी असे पूर्वीच्या स्टाईलचे चोकर या पेशवाई लुकसाठी साजेसे ठरले आहेत. कोल्हापूरी साज ही अस्सल मराठमोळी ज्वेलरीही भाव खाऊन जाते आहे. कोल्हापूरी साज अस्सल मराठमोळा प्रकार जो जव मणी, तावीज, अष्टमंगळ अशा विविध प्रकारच्या मण्यांनी बनवतात. पूर्वीच्या काळी ठसठसशीत नाकापासून ते खालच्या ओठापर्यंत नथ हा दागिना असायचा, आता क्लिप नथ सुद्धा मिळते. तीन पदरी राणी हार जो पैठणी वर अगदी खुलून दिसतो. दंडावर घालायचा वाकी/ बाजूबंद दागिना पूर्वीच्या काळी दोन्ही दंडावर घालायचे आता शक्यतो एकाच घालतात. ह्याच सोबत चपला हार, पोहे हार, बकूळी हार अनेक विविध प्रकार लोकप्रिय आहेत. मोहनमाळ हा २ ते ८ पदरांचा हारही पेशवाई लुकसाठी साजेसा असा. लक्ष्मी हार म्हणजे पूर्वीच्या काळची टेंपल ज्वेलरीही ट्रेण्डमध्ये आहे त्याचबरोबर चिंचपेटी, खोपा (आंबाड्यात घालण्याचा दागिना), बुगड्या (कानाच्यावर घालायचा दागिना) बाजूबंद आणि मोत्यांचे दागिनेही लक्ष वेधून घेत आहेत. वराच्या हातात पेशव्यांप्रमाणे तलवार घेऊनही पेशवाई लुक पुर्ण केला जात आहे.
हौसेखातर केलेला हा साज तरूणांना एकप्रकारे आपल्या संस्कृतीशी जोडून ठेवणारा धागा आहे असं म्हणायला हरकत नाही. आपल्या श्रीमंत संस्कृतीचे हे पैलू तरूणपिढी नाविन्याची झालर देऊन अभिमानाने मिरवते, हे समाधानकारकच आहे. आपण परत आपल्याच मुळ संस्कृतीचा वारसा पुढं चालवत आहोत हेच यावरून सिद्ध होते तेव्हा तूम्ही आपल्या लग्नात असा पेशवाई थाट नक्कीच प्लॅन करायला विसरू नका.
English